Falam kan Unau nih Sing 7500 Leng Man Bak Mizoram Cozah ah An Pek

Home

Myanmar ralzaam hna caah sing 7,500 leng man sii lei thilri peknak program Mizoram ah an tuah
Mizoram chungah a rak i dormi Myanmar ralzaam hna zohkhenhnak caah US in a phanmi Project-Mizoram 22 program in hmuhmi sii lei thilri pawl peknak cu August 10 Aizawl khua Floria Hotel ah an tuah tiah theih a si.

Project-Mizoram program cu US ah hram a bunhmi vawlei cung a nganbik ngandamnak bawmtu phu Project C.U.R.E, Myanmar ram bawmtu phu-Mizoram (MRRC-M), Mizo Student Union (MSU), R2P Myanmar Way, Aizawl khua ah a ummi BN Hospital, Research Center Mizoram, Arizona Falam Christian Church le Chin Baptist Association North America phu hna fonh in tuahmi a si.

Sii le sii lei thilri hna cu sing 7,500 leng man a si i ngandamnak caah sii le adang eidin bawmhnak program zong a um rih tiah theih a si. Cu Project-Mizoram 22 in hmuhmi sii le sii lei thilri pawl cu MSU le MRRC-M phu sinah pek a si i adang ngandamnak seh thilri pawl cu Aizawl khua BN sizung ah pek a si.

Cu thilri peknak program ah Chin ramkulh Minister hlun U Lian Luai, Hluttaw palai cheukhat le phu kip in rianngeitu pawl an kai kho tiah theih a si. Chin ramkulh he ramri aa pehnak Mizoram ah Myanmar ralzaam 40,000 deng an i dor i Mizoram cozah le mipi phu nih an bawmh hna.The Chinland Post