Evan Tluang Lian nih LAI MEDIA Ralrin Apek Hna

Home

HI BANTUK MI HNA HI KAN MIPHUN A KAN DOHTU KAN RAAL NGAN PAKHAT AN SI- Atu lioah, Laimi thawngpang țialtu hna lakah, lih le biaperh rumro in țial a hmangmi an um len cang!
Tahchunhnak ah, USA, Hakha ah, Pastor pa nih nu a ihpi hna tibantuk. Sex kong a țial i sex hmaanthlak a taartawntu hna.

Cuka ahcun, an i kap i tampi an thi, tibantuk, Dr. Ngun Cung Lian um hlah selaw, tibantuk. Hakha a him tilo, tibantuk. Țih nung tuk e, tibantuk. Apoi tuk e, tibantuk hna in lih leh biaperh kha an țial tawn i an hun thlah nolh lengmang tawn!

Lai mi a tam deuh nih Facebook hi rel cio a si tikah, Lai mi nu le pa tampi thinphang thlalau le lungrethei in an tuah hna i Lai Miphun hi an kan deh i an kan hlen lengmang! Hi tluk i rai le ral le thilmanfah (Mangțaam) ruang i kan Miphun lungrethei in a um lio; Inn le lo a kangh ruang le fapa/fanu hna ral kut in an thih lungfah ruang le ral țih ruang i raal kan zaam lio, thazaang pek kan herh tuk lio hna i, lih le biaperh in mi hlen, mi țhih a hmangmi hna hi, Lai Miphun a kan dohtu le kan raal ngan taktak an si cang!

Hi bantuk mi hna hi, kan Miphun lakah, nun ve an phu lo, dam ve zong an i tlak lo. Rak i ngai chih hna sehlaw, rak i țhinh hna seh. Cu lo ahcun, BAWIPA kut nih a tongh hna lai tiah, kan BAWIPA JESUH KHRIH MIN in ralrinnak ka pek hna. KHRIH Lamkaltu Tluang Lian (Martar)

Kan ram sipuazi hmailei ah zeidah a lawh lai?- Inflation a sang ngai. Thil man a kai, duhsahte in siloin tihbahnung rang taktak in a kai. Cuti a kai ahcun Hyper-inflation ti a si. Cozah nih a control khawh ti lo le rate khiahmi thilman pawl a lonh tik ah a cang tawn. Cu ti an control khawh ti lo tik ah phaisa cung ah zumhnak a tlau.

Macroeconomic dirhmun In zoh ahcun thilman a kai hi supply nak in demand hi fak tuk in a ngan caah a si tiah biahlanak ah i al tawnmi a si. Thilmankai – Inflation hi cu fiangte in chim ahcun “macroeconomic” ruang ah a si i macroeconomic a that lo cu cozah ruang ah a si. Phaisa tam tuk a rial caah zong ah a si kho cun monetary policy hi fawi tuk I a mer lengmang ruang ah a si. Ramchung budget chanbaunak a phichuah khawhnak Phaisa duhzat poah a rial lengmang ahcun hyper-inflation a chuahpi i cu nih purchasing power a tlak pin ah ram sipuazi a tlakchuk lei ah a kalter.

Monetary policies rengh tuk ruangah le Austerity (har nunning) timi policy a tlaih ahcun recession hi atu le atu a chuahter lai. US zong ah 1961-81 tiang hi tight monetary policy le austerity policy ruang ah 1970s ah a nolh than lengmang mi sipuazi tlakchuknak a chuahter lengmang (repeated recessions).

Cozah nih ramchung phaisa a har tuk lio ah ramdang thilphiar (import) hi thumh i export hi karhter an i zuam tawn i a herh taktakmi thil lawng ramleng in cawk i a herh tuk lo mi thil pawl ah policy rengh i tim kha frugality a si i cucu khuasak thiam kan ti lai maw kher ngai le hnem ngai i thil kha a herh taktak lawng ah cawk le hman kha a si nain Austerity ah a phan tawn.

Cu ti a tuah lio ah dollar kha a control i ramdang chawphiar a duhmi dollar an duh zat zuar ti lo (Suzuki mawtaw kampani le a dang tampi an chuak), ramdang chawnphiar le chawkuat pawl sin in dollar kha amah cozah khiahmi rate in thlenter ti bantuk a vun tuah tik ah le ngunkhuai phun tariff fak deuh in a lak, license fawile bai in a thla/pe ti lo tik ah a miak (profit) a tlawm cang i ramdang chawluh chuahphiar a tla. Ramdang tangka a lutmi a tlawm.

Cozah nih project pawl tuah ti lo in an ngol. Ramdang tangka (foreign reserve fund) a ngeihmi a tlawm i hmuhnak lam a har chinchin i ramchung um ramdang tangka vialte khomh dih a timh. Datsi, Diesel, sii le cozah nih a herhmi thil pawl ramleng in cawknak ah ramdang phaisa kha a khon a hau a herh tuk cang tik ah ramchung um dollar kha fim dih aa timh tik ah a hmuh khawhmi le a ummi phaisa hi tu hnu thla 6 caah a zat lai maw a za deuh lai lo dik. Thla 6 a nung kho ti lai maw? Zeidah a cang lai?

Stagflation timi cu sipuazi a thangcho lomi (luang ti lo) a si pin ah thilmankai (inflation) le rian neilo milu karh phunhnih fonh in a zual caan kha a si. Recession tu hi cu a tlangpi in sipuazi tlakchuk hi a si ko. GDP tlakchuk a si i ram tam deuh le caan tam deuh ahcun thla 6 hrawng hi a rau tawn. GDP a tlawm deuh ah maw a GDP thangchomi negative a cang ahcun recession ti khawh a si i quarter pa 2 hrawng pehzulh in a cang ahcun recession tiah auh khawh a si.

Cu recession cu caan saupi a peh ahcun Depression ah a cang. Depression a sau ahcun economy collapse a cang, sipuazi a cim a pur. Sri Lanka ram sipuazi a cim a tluknak a ruang hi a biapi in phun 6 in a um nain cu chung ah Kawlram he a lawh ngai nak pakhat hnih cu an ramdang phaisa thlen hi an cozah nih a control tuk nain a leng ah black market ah an thlen cio, ramchung ramleng business tuah pawl nih a leng rate an hman deuh,

ngunkhuai a thumh tik ah cozah nih phaisa a hmuhmi a tlawm, organic farming tha a pek tuk tik ah lakphak le facang chuak a tla, ramleng in facang an cawk a hau (USD million 450 man), phaisa tampi a rial, cozah nih phaisa tampi a hman (project maw hriamnam) maw ti bantuk in cu chap ah ramdang phaisa a batmi hna hi USD 51 billion a si. Kawlram nihin dirhmun he a lo ngai, a naih ngai ve cang tinak a si. Kan ram sipuazi a cim kho cang caah khuasak thiam, nunthiam le fimkhor te in thawngpang hi nifa zulh ah a tha. Sui Hingz