Evan Tluang Lian: BAWIPA cu Kan Phaw le Teinak Asi Cang

Home

BAWIPA CU KAN PHAW LE TEINAK A SI CANG- Nov 21 zingka zong, zing dang bantukin, Chin ram, Myanmar ram le Vawlei pumpi caah thla ka cam. Kan Miphun himnak ca i thla ka hun camah, zing dang ahcun, “BAWIPA kan Phaw le Teinak si ko,” tiah, Zakhariah 9:15 cherhchanin ka cam tawn. Nov 21 zingka ahcun, ka thlacam ning biafang cu, Ka chung i a ummi, PATHIAN THLARAU nih a hun ka thlen i, “BAWIPA kan Phaw le kan Teinak na si cang,” tiah ka hun cam! Haleluia!!!

Ka thlacam ning, PATHIAN THLARAU nih a țhanchoter ti ka hngalh i kaa lunghmuih ngaingai! Zeicahtiah, PATHIAN THLARAU nih, Biafang pakhat, “Cang,” ti a kan pekmi hi a biapi tuk hrinhrang! Hi hi nikhat ca lawng a si lo i Teinak a tlamtlin hlan tiang caah a si. BAWIPA nih, a THLARAU in a kan pekmi Biafang pakhat hi kan Himnak le Teinak caah a tling i a tlintertu zong BAWIPA a si.

“BAWIPA cu kan Phaw le kan Teinak a si cang!” ti, Thawngțha hi kan Miphun caah a si. BAWIPA nih a thim i a țanh hna i , a dirpimi le a umpimi, Miphun nih hin, BAWIPA cu kan Țih i kan Upat i kan lam țhalo hnain kan i mer cio ve awk a si. Kan Miphun cungah BAWIPA Kan PATHIAN Velngeihnak le Zaangfahnak cu a tam ko! BAWIPA JESUH nih Vel le Daihnak in pe hna seh. BAWIPA dawtmi
A lamkaltu le a sal Tluang Lian (Martar)

Russia a Chuah hnu in Kherson ai Sersiam Than- Kherson khuapi a luatnak hi zarh khat a si cang ko nain, thlapa thla 9 chung Russia kut an tuarmi hi khuami hna nih an buaipi peng ko rih. Mitlau an tam, hmunkip ah bomb tarhmi an um rih, dawr tampi ai khar ko rih, mei le ti duhning in hman awk a um rih lo. Dnieper River ralchan veve in Ukraine le Russia heh tiah chun zan in an i kahtonh peng rih caah ah bomb thawngpang a leng peng ko rih. Mahtluk harnak tampi an ton ko zongah cun khuami hna cu an thaw a chuak, an i lawm, a thatnak lei kapin khua an ruat.

“Thawchuah a fawideuh suaumau. A tu ah cun zeizong te ai thleng dih cang e. Kan Ukraine ralkap khua chung an hung luh lio cu kan i lawmhtuk ah a chim zia kan thiam lo” tiin lomhnak in a khatmi sidawr zuartu Olena Smoliana nih a chim. Ral thawh hlan ah khan Kherson khuapi minung hi 300,000 an si i, a tu hi 80,000 hrawng lawng an tang. Monday ah khan Zelensky nih a vung veh hna i Russia an thawl khawhmi kongah a lunglomhnak a langhter. ‘Hihi ral a donghnak a hramthoktu a si’ tiin a chim.

Khuami hna cu leng chuah an ttih ti lo, Russia nih an kan tlaih lai i thong ah an kan thlak lai, an kan hrem lai, ti zong an phang ti lo. Khuapi laicer ah an i pum hna, an zal le angkilum ah an Flag rong an suai cio hna. An phone an tun hna, ti an than, an innpa le sahlawh he bia an i ruah kho than cang hna. “Russia kut kan lalh khawh a si ah cun, tirawl, mei kong i chambau in kan ummi tham hi cu fawitein kan lalh khawh ko lai’ tiin Russia nih an khua an lak hnu ah inn a vapa he inn lawngah ai erh pengmi Yulia Nenadyschuk, 53, nih a chim. A tu ah cun an nuva tein ni chiarte khuachungah a ra cang.

“Chambauhnak nganbik cu na sining tein si kho lo dingin zalonnak an in lakpiak mi hi a si. Cu dirhmun cu kiam chung khumh he ai khat,” tiin Yulia nih a chim. “Zeikong hmanh thang in na chim ngam lo, Ukraine holh zong na hmang ngam lo. An kan ngiatthlai peng, a kehorh hmanh i mer a ngah lo” tiin Oleksandr Nenadyschuk, 57, nih a chim. A kan ramhmi hi ‘a thawng ai thei lo mi thil tthinung’ (silent terror) tiin kan auh. Kadang Ukraine khua pawl an lak bantuk he kan sining ai lo ve lo, tiin Kherson khuami hna nih an chim.

Tutan ral ai thawh ka hrawngin khan Crimea lei in Russia pawl an hung lut i, Kherson cu an lak colh. Kherson i mipi tam u cu Russia holh in kan i chawn ngawt hna. Ral ai thawh ka hrawngah khan cun Russia a tanhmi innpa pawl hi an innpa hna nih an ruahthiam ko hna. Asinain thla 9 chung kan luh hnu cun an ngaithiam kho cawk ti hna lo. Russia holh hman hmanh ka ning a zak cang. Russia pawl nih kan taksa le thinlung tiangin an kan hrem, tiin sidawr ngeitu Smoliana nih a chim.

Mi tampi nih khua an chuah tak, a cheu cu a lolh in an lo dup. Khrystyna Yuldasheva, 18, hi Russia police nih thong bantuk in an hmannak dawr pakhat ah rian a tuanmi a si i, a tu hi cuka inn ah cun Russia nih ral phung an buar le buar lo Ukraine cozah nih hlathlainak a tuah lio pi a si. “Mah ka hin ahohmanh an um ti lo,’ tiin a fapa a hung kawlmi hringtunu pakhat cu a Khrystyna nih a chim. ‘A dang zong chuah an i tim ve nain, an chuak kho lo. Voithum tiang chuah kai tim ve, asinain khuapi chuahnak lam a si mi paoh an phih dih’ tiin Teitiana, 37, nih a chim. Nov. 11 i Russia nih Kherson khuapi an chuah tak ah khan lawng kawro in an kaltak. Mei, ti, phone le linka (transportation) pakhat hmanh an um ti lo.

Dawr hme tete ah cun Russia ser thilri pawl an um ko rih. ‘Ukraine le Russia hi ram khat kan si. Ukraine nih Russia passport nan i ngeih khawh’ timi catar lawng te khuapi chungah a khat. Mah cu ca an hmuh paoh ah a cheukhat khua mi hna nih chiat an serh. Dawr, rawldawr, hotels tampi cu an kar ko rih. Mi tampi rian lo an si. Asinain Ukraine supermarkets phu pawl nih truck in heh tiah mipi cu tirawl an ngalh hna. Internet zong an bunhpiak colh hna. Russia pawl an kir le cangka mipi an lawmtuk ko nain, Kherson ah zei hmanh duhning in a kal kho rih ruam lo. Kherson ah a zammi khuami hna kirter than ding le khua remhsiamnak kalpi dingah cun Russia nih an tunhmi bomb vialte phelh ta dih an hau hmasa lai, tiin Ministry of Internal Affairs nih a chim.

“Khuasaknak umter than dingah cun bomb phelhpiak rian hi kalpi a hau hmasa’ tiin MIA Mary Akopian nih a chim. Kherson hi a dang khua nakin Russia kut a um chung a sau deuh caah, a chung i bomb tarhmi zong hi a tamdeuh ving. Cucaah khuachung le a kiangkap i tarhmi bomb vialte phelhnak dingah cun kum tamial a rau rih ding a si. Kherson i tarhmi bomb phelh rian a tlaimi chungin minung 25 bak an thi cang. Khua lei a hung kirhnawhmi khuami pahra lenglo bomb an i lamh i an thi.

Khua an chuahtak hlan ah Russia ralkap nih dawr an bauh, kan museums (piahteih) thilri hmanh an fir ta. Kherson pengkulh i kan chiahmi pupa rothil 15,000 lenglo hi an fir i Crimea lei ah an kalpi, tiin Ukraine cozah nih a chim. “Kan piahteih ah zeihmanh a tang ti lo. Russia pawl hi lainawng, mifir, bomb tarh hmang an si’ tiin Zelensky office ah senior official a si mi Kyrylo Tymoshenko nih a chim. Kherson khuapi cu an chuahtak ko nain, a pengkulh chung i 70% tluk hi Russia kut ah a tang peng ko rih. Khua chungah bomb thawng an theih peng ko rih. Tarhmi bomb an phelhmi maw a si, asiloah kaphnih an i kah tonhmi bomb thawng dah a si, ti an fiang lo.

An pawng te ah kahdohnak a linsa ngai ko nain, cun vanlawng in kah nan si kho men rih, tiin biaka a leng ko nain, Kherson mipi pawl cu an hna a ngam ngai cang i, tam u cu khuapi chung lampi ah an chuak cang hna. Khat le khat an i suahlam, Ukraine ralkap pawl sinah lomhnak bia an chim hna. Nenadyschuks nuva hna zong an lung a thawng ko rih. ‘Kan i chang tualmal ko rih. Teinak lawng kan hngak ko. Kan vuivai lai lo. Ukraine pumpi hi kanmah bantuk tein an lung a thawng dih’ tiin an chim. chelseabawi