Dr.Za Thio- Hrinthan Hi Nolh Khawh Phung Asi Ti Lo

Home

Pathian Fa Kan Si Zungzal ( A Child of God Forever) Gal 3:27 = Zeicahtiah Khrih Jesuh nan zumhnak thawng in Pathian fa nan si cang. Khamh kan co le Pathian fa kan si cu zeidang ruangah si lo in khamhnak thawng-tha kan theih i Khrih kan zumh ruang lawngah asi. Efesa 1:13 ah, ” Cun nannih zong nan khamhnak thawngtha biatak bia kha nan theih i Khrih kha nan zumh hnu ah, kamhni Thlarau Thiang he cakhenh kha khenh nan si,” tiah Paul nih ati. Efesa2:8zongah hitin ati rih: ” Zeicahtiah vel an ngeih hna caah zumhnak thawng in khamh nan si cu nanmah tuahnak thawng in asi lo,Pathian laksawng asi.” Khamh asi paoh cu Pathian fa kan si dih. Zeicahtiah Khrih kanĀ  zumh bak in Pathian in hrinmi kan si, Johan 1:12,13.

Kan hrinmi fale cu zeiti dirhmun an phak zongah kan fale an si peng ko. Fapa tlaupa kan ti tawnmi zong vok kawm i rawltam emem i a um lio ah a pa fa asi thiam ko. Cucaah a kir i a pa he an i kuh ah khan,” Ka pa, van i a ummi Pathian le nangmah ralchanh in ka sual cang,” ati. Kha tikah apa nih nang cu ka fapa na si ti lo ati lo khah. Ai lawm tuk i angki fual a hrukter hna, kutdonghrolh a hrolhter hna, cun kedanh zong an danh i cawfa an thah i puai tiang a tuahpiak. Mah lio a bia kha uar a um tuk, ” Hi KA FAPA HI A RAK THI I A NUNG THAN,” ati ( Luke 15:21-24).

Hi ka zawn i a rak THI atimi hi hel tlading ati tiin maw ruat lai cih, thih a sullam cu i then hi dawh asi cu. Hi ve bang Pathian i hrinmi a fale paoh cu zungzal in Pathian fa kan si. Johan nih cun hitin a cakuat ah a tial. “Zohhmanh u, Pathian fale tiah kawh kan si hi, zeitluk in a nganmi dawtnak dah Pa nih a kan peek,” 1Johan 3:1. Khrih a zumtu hna hi Baibal nih Pathian fa nan si lio ati lo, NAN SI CANG ati,Gal 3:26. Kan si cang taktak.

Hrinthan hi nawlh khawh phung asi ti loh. Taksa i hrin kan simi zong kan nu le kan pa nih an kan nawlh piak kho lo. Pate ngeih kan duh, nute hi khirh usih law pate in hring than usih ti khawh asi loh. A nak tuk, a mui a chia tuk, a thar in hring usih ti khawh asi lo. Va si kho reng seh law ka nu
kha ‘ka hringthan’ tiah um awk tha lo in ka nawl hnga. Baibal khuazei ka hmanh ah Thlarau i hrin cangmi Pathian fale nih an sual tikah hrinthan nawlh hna seh ti a um lo.

Kan sual asi le cu kan sualnak bel phuan a kan fial. Cu zong cu fa si thannak dingah asi lo, sual ngaihthiam kan si i thianter kan sinak lai caah asi, 1Johan 1:8,9 Cuti kan sual kan phuan i thianter kan si hnu cun kan Pa, Pathian he kan i hawikom kho than. David nih Bethsheba a ihpi hnu i a sual ai chir tik i Pathian sin i thla a cam ah khan, ” Ka khamh than,” ati lo. ” Na khamhnak chung in a chuakmi lawmhnak kha ka pee than,” ti tu in ati, Sam 51:12.

Kan sual tikah Pathian fa kan sinak a cat lo, kan i hawikomhnak tu a cat i kan khamh lawmhnak a tlau. Zumtu hna kan caah cun chaw le va nak in khamh lawmhnah thlau kan siang lo deuh. Pathian fale caah ralrin awk a um. Cucu – kan sualnak le kan palhnak kan hngalh ko bu i sual phuang lo i kan um le kan lung a khon peng ahcun kan Pa nih faklak in a kan chimhhrin ko lai.

” Zeicahtiah Bawipa nih a dawtmi hna cu dan a tat tawn hna i fa i a cohlanmi cu a chimhhrin tawn hna,” tiah Hebru catialtu nih a ti,Heb 12:6. Pathian fa ka si zungzal ti kai fianmi nih sualnak lei ah si lo in nun thiannak lei tu ah a ka hruai deuh. Cupinah ka nun hna zong a ngam ter tuk. Ka dawhceo tuk bu zong in ‘ Ka Pa’ tiah ka ti ngam i ka fuh ngam. A fa i a kan cohlang- tu kan Pathian a min thangthat si ko seh! Amen and Amen.