Dr.Rual Uk nih Oneness An Pathian hi Zeidah Asi Timi Afianter Chap

dailychin Home

ONENESS HNA NIH ‘PA PATHIAN’ TIAH AN TIMI LE BAIBAL NIH ‘PA PATHIAN’ TIAH A TIMI CU VAN LE VAWLEI AI HLÂT NÂK HMANH IN AI HLÂT DEUH- Zeitintiah Oneness hna nih cun Isaiah 9:6 le Johan 14:9 kha i chirhchan in Fapa Jesuh Khrih hi Pa Pathian timi cu a si ko tiah an ti. Cucaah thla an cam tikah Jesuh min in Jesuh sin lila ah thla an cam i an thlacam donghnâk ah ‘Jesuh NA min in’ tiah an ti tawn.

Asinain Biakam Thar Baibal nih ‘Pa Pathian’ tiah voi 13 a timi ah Fapa Jesuh Khrih hi Pa Pathian a si, tiah voi khat te hmanh a ti bal lo. Pa Pathian le Bawipa Jesuh Khrih tiah fel tein an țhen dih. Johan. 6:27. 1Kor 15:24. Gal. 1:3. Efe 6:23. Kol. 3:17. 1Thes 1:1 2Thes 1:1.2Tim 1:2. Tita 1:4. 1Pet. 1:2. 2Pet. 1:17. 2Johan. 1:3. Jude 1:1. Hi Balbal ca câng hna hi Lai Baibal Thiang timi lawngah zoh loin ‘Baibal Cathiang’ timi le NKJV ah zoh law ‘Pa Pathian, God the Father tiah an ti dih lai.

Amah Jesuh hrim hrim zong nih ‘Pa Pathian nih a chinchiah mi a si cang nâk kha fel le fiang tein a chim. Johan 6:27.
Cuticun Fapa Jesuh nih Pa Pathian thlahmi a si kha fiang tein ai hngalh caah a thlahtu Pa Pathian duhnâk le tinhmi tlinter ding in vailam cung thihnãk tiang tuar in a thlahtu Pa Pathian nawl kha a ngai. Filipi 2:8 Cucaah Pa Pathian zong nih thihnâk thlanmui chungin Fapa Jesuh cu a thawhter (Rom 6:4) i min vialte lak ah min cungnung bik a pek hlei ah lei le van nawlngeihnâk vialte kha a pek. Filipi 2:9. Mathai 28:18.

Pa Pathian pekmi nawlngeihnâk he Fapa Jesuh a rat i biacaihnâk vialte le nawlngeihnâk vialte le țhawnnak vialte kha a donghter hnu ah donghnâk tak tak kha a phân la i i Pennâk kha Fapa Jesuh nih Pa Pathian sin ah a chanh țhan te lai, tiah Baibal nih a ti. 1Kor. 15:24. Van le vawlei a dongh hnu hmanh ah Fapa Jesuh le Pa Pathian cu a dang tein an um ko rih lai ti hi lei le van a rawh hmanh ah a hmun laimi Cathiang, Pathian bia nih a chimning a si. Cucaah Oneness hna nih Pa Pathian an timi le Baibal nih Pa Pathian a timi cu van le vawlei ai hlat nâk hmanh in ai hlat deuh mi a si.