Chungkhar nih Tangka Sing 10 Pekhawhlo Ruangah Chinpa KIM PU,33, cu Ralhrang nih An Thah

Home

Chinmi pa pakhat cu ralkap nih an tlaih i sing 10 in an hlam lo ruangah an thah-  Sagsing ramṭhen, India-Myanmar ramri, Tamu ah Chin miphun a simi Ko Kim Pu cu August 13 ah SAC ralkap nih an tlaih i a chungkhar hna kha sing 10 in rak hlam uh tiah an ti hna. A chungkhar pawl tangka an har tuk lio a si caah an hlam kho zokzok lo i ralkap nih an thah tiah theih a si.

Ko Kim Pu ruak cu sizung ah an rak lak ter hna i August 14 ah an vuai tiah Ko Kim Pu hawipa nih Khit Thit ah a chim. “An thahmi hi ka hawipa kum 33 a simi Kim Pu a si. August 13 ah ralkap nih an tlaih. Moeye lei ah thilri cawk dingin a kal lioah an tlaih. Ralkap nih a chungkhar kha sing 10 in an hlamter hna. Tangka an ngei lo i an chimmi nicaan ah an hlam khawh lo caah an thah. Ko Kim Pu nih a nu, a nupi le a fapa pakhat a tantak hna” tiah a chim.

Ko Kim Pu hi thil a zuarmi mi sawhsawh a si. India-Myanmar ramri, Tamu ah Pyusawhtee le ralkap pawl an hrang tuk. Tangka a ngeimi hna inn kha meithal in an tlerh hna i an tangka an chuh hna tiah ” Ko Kim Pu hawipa nih a chim. The Chinland Post