Chinram ah India Ralkap An Lawr Ngaingai

Chin Ramkulh Ah India Assam Rifle Tam Ngai An Lut, Meithal Voi Tam Ngai An Puah. Chin ramkulh, Paletwa peng Shwelaikwa khua tiang India Assam Rifle 15 hrawng cu an hriamnam he nizan March ni 13 zinglei ah an lut. An kir lei zong ah meithal zun 10 hrawng an puah, tiah theih a si. Assam Rifle an luhnak hmun hi CDF-Paletwa Battaion 2 nih hram an bunhnak hmun he aa hlat tuk lonak hmun a si. Chin ramkulh chung ah Assam Rifle hi a voihnihnak an luh a si cang, tiah theih a si.

CDF-Paletwa Chairman nih, “Assam Rifle nih ramri ah lung phunmi zoh ding in an ti i, atu he hin a voihnihnak hriamnam he an rat a si cang. Ramri lung phunmi le Shwelaikwa khua hi meng 1 tluk aa hlatmi a si ko nain khua tiang in an lut. Hihi CDF-Paletwa ngiathlai an kan duh caah a si ko,” tiah a chim.

Assam Rifle hi Paletwa ramchung an luh tik paoh ah SAC ralkap nih rallam an sial ve. India le NUG kar i ruahnak hi zeitiang dah hma a kal cang ti hngalh ka duh ngaingai, tiah a chim chap. Tukum March thla hramthawk lio zong ah Assam Rifle pawl cu Tedim peng tiang an lut i minung pakhat zong an rak tlaih cang, tiah theih a si. The Chin Post