Chinmi 3 Taksapur In Thah An Tong Hoi

Bangladesh Ralkap Nih Bawm (Chin) mi Pathum Zohchia Ngai In An Thah Hna! Nizan May 8, 2023 ah Bangladesh ralkap le United People’s Democratic Front(UPDF) ralhrang hna nih Bangladesh ram i a ummi sualnak ngei lo Bawm(Chin) mi pathum cu zohchia ngai in an thah hna, tiah Kuki-Chin National Army(KNA) ralbawi pakhat nih The Chin Post ah a chim. Thah a tong mi tualchung mi hna hi Nem Thang Bawm(kum 35), Sang Lian Bawm (kum 19) le Lal Lom Lian Bawm (kum 25) hna an si i, Sang Lian Bawm hi tanghra cawng lio mi a si.

United People’s Democratic Front(UPDF) hi Bangladesh ramchung ah a um mi ralhrang phu pakhat an si i, Bangladesh cozah nih hriamnam a pek mi hna an si pinah Bangladesh cozah nih an herhnak ah an hman tawn mi hna an si, tiah KNA ralkap nih cun a chim. A luancia April 7 zong ah khan Bangladesh ralkap le UPDF hna nih sualnak ngei lo tualchung mi 8 cu ruruhranghrang ngai in an rak thah cang hna, tiah a chimchap.

Bangladesh um Chin mi hna nih Bangladesh cozah sin ah mahte khuakhan lairel an duhnak an langhter ruangah Kuki-Chin National Army(KNA) le Bangladesh Ralkap hna karah kahdohnak a chuak i, tualchung mi tam ngai cu harnak an tong. Tualchung mi umnak inn le lo hrawhpiak an ton ruangah minung zeimawzat cu Mizoram lei ah an rak zaam hna i, Lawngtlai peng an rak fuh hna. Kan thawnglaknak nih a kan chimh ning ah Bangladesh in Lawngtlai peng ah a zaam mi hi a tlawm bik minung 400 an phan lai, tiah a chim.

Ralzaam hi nifatin an karh caah a zat fiang in a kan chim kho lo. A luancia zarh ah khan Bangladesh in a rak zaam mi hna cu India ralkap nih an kham hna nain Hmawngbu khuatlang nih ralzaam hna cu an dirkamh hna i, India ralkap sinah an nawlpiak hna hnu ah atu cu zalong deuh in an um kho cang, tiah Hmawngbu khua mi pakhat nih The Chin Post ah a chim.