CDF-KKG  Ralbawi Hna Pathian An I Bochan Ning, Uar An Um Tuk

Home

Nihin ah Vaurawng Zuunthil nih KKG caah tlang an au cuahmah lio asi. Tuzing ah KKG ralbawi nih biachimnak a ngei. Atimi cu, CDF-KKG hi miphun dangdang, biaknak dangdang aa fonh in riantuantti mi kan si hna. Cun kan umnak hmun hi hmun biapi taktak asi caah hriamnam hi kan herh ngai ngai ko.

Pathian hi kan zeizong vialte a si, Amah Pathian kan ibochan ah cun zeipoh tlam a tling ko lai. Cun, CNA,CNF hi ka upat tuk hna. Anmah lawnglawng hi Chin miphun caah hriamtlai an si I, anmah um hna hlah sehlaw CDF zong hi kan um kho hnga lo. Cu caah CNA hi kan caah an biapi  tuk tiah KKG DS nih achim.

Battalion 4 hruaitu nih achimmi chung in uar a um tukmi pakhat cu, Ral kan dohnak ah meithal cu abiapi tuk ko, cu nakin a biapi deuh mi cu Pathian hi asi. Lam naih tein ralhrang he kan i kap, an kan kheng lo, bomb kan pawng te ah a tla nain a puak lo. Cu cu Pathian umpinak asi. Nihin tiangah kan nunnak a liam lengmang mi hi ralhrang meithal le bomb in si loin kanmah hriamnam hmanmi ruang ah asi bik.

Cu cu kan tuah lo ahcun hriamnam dang kan ngei lo, tih anung ti kan theih ko buin tuah lo awk a that lo caah kan tuah hau. Dohthlennak tuah hi kan huam ti lo tiin inn hlam ding zongah inn kan ngei ti lo, ramdang lei kal duh zongah kalnak kan thei lo. Cu caah ralhrang hi kan duh maw duhlo maw kan doh awk asi ti hi kan i seh chih ko tiah achim.

PANLONG IN KUMZABU (21) PANLONG AH- Tlangcung ah a ummi Chin, Kachin le Shan miphun hna le General Aung San hruaimi hmunrawn khuasa Kawl miphun hna cu 1947 February 12 ni ah Panlong khua ah hnatlaknak minsen an rak thuṭi hna. Panglong minsen an thutnak thawngin cun Miraang uknak chungin 1948 January 4 ni ah zalawnnak, luatnak cu kan van hmu hna i cuticun Myanmar ramkomh (Union Of Myanmar) cu a hung chuak.

Miraang kut in zalawnnak kan hmuh hnu Myanmar ram a hruaitu (Kawl miphun) pakhat hnu pakhat nih Panlong minsen rak thutmi cu an i philhter riangmang asiloah biakamnak he minsen rak thutmi hna kha zul duh loin an i umter riangmang ruangah Kawl cozah dohtu (Tlangcung hriamtlai bu) hna cu hung um a van si i, ram chungah i tukdohnak le buainak cu a vun chuak i atu tiangin a dai kho rih lo.

Cuticun kan rampi cu kum (70) hrawnghrang Kawl miphun hna uknak tangah a pehpeh in a vun um hnu cun chawleh chawhrawlnak lei in siseh, fimthiamnak lei in siseh, ngandamnak le a dangdang lei in siseh a ṭumchuk thluahmah i lei cung lei tang thilchuak le thil mansung he a khatmi ram rum pi cu vawlei cungah ram sifak bik dirhmun ah a vun i chuah diam ko ai.

Tlangcung hriamtlai hna zong nih ram uktu cozah ṭha lo cu a hram in an bawngh khawh lo bantukin ram uktu Kawl cozah zong nih tlangcungmi hna nih kan duhmi mahte uknak le khuakhan lairelnak zong cu a kan pe in a kan sianh ve fawn hoi lo.

Hi kong hi a hramthawk in kan zoh ṭhan a si ahcun Panlong min thutnak hi rak um hlah seh law tlangcungmi hna hi Kawl miphun uknak tang ah atu tiangin kan um hnga lo. Panlong minsen rak thutnak kong hi ruah lo awk a ṭha tawn lomi thil pakhat a si. Panlong minsen rak thutnak kong kha ruah lengmang, ruah lengmang in atu cu kumzabu (21) chung zongah kan hung lut cang ko. Salai K. Biak Lian Thawng