CDF-Kanpetlet nih CDM tuah Duhlomi Bawi Minung 8 An Tlaih Hna

CDM a tuah lomi cozah rianṭuantu 8 cu CDF-Kanpetlet nih ramchung in ṭawl ding tiah dantatnak an pek hna
– Civil Disobedience Movement (CDM) a tuah lomi Chin ramkulh, Kanpetlet peng Doctor Aung San Oo telh in cozah rianṭuantu minung 8 cu Kanpetlet khuapi in chuah ding tiah CDF-Kanpetlet nih dantatnak an pek hna. Kanpetlet khuami cozah rianṭuantu he a dang hmunhma in cozah rianṭuantu pawl zong ramchung in chuah ding tiah dantatnak kan pek hna hi a si tiah CDF-Kanpetlet biachimnak nawl a ngeitu Salai Htun Ling Thang nih RFA ah a chim.

 

“Tlaih hnu in dantatnak pekmi minung 8 an si. Tlaih hnu ah a ziizut an si. Kanmah peng mipi uknak phu, biaceihnak phu nih Non-CDM pawl caah sermi phungning tein Kanpetlet khuachung in chuah ding tiah dantatnak pek an si. Kan tlaihmi hna chungah Kanpetlet khuami hna an i tel bantuk in hmundang mi zong an i tel”.

Peng Doctor Aung San Oo, Department of Land Management and Statistics bawi U Van To, Khonumthung National Park a tlaitu U Htun Tin, Middle School sianguk U Aye Maung, Peng fimcawnnak zung in Daw Om Yaung, Middle School siangcachim U Shwe Ling, Sate Department of Land Management and Statistics in Daw Thu Zar Aye le Daw Shin Kee Ling hna an si.

Peng Doctor Aung San Oo cu Kanpetlet khuami a si caah Kanpetlet hmunhma chungah umding in chimh a si tiah CDF-Kanpetlet biachimnak nawl a ngeitu nih a chim. CDM a tuah lomi cozah rianṭuantu pawl hi CDF chungtel hna nih tlaih in a ziizutnak an tuah hna hi a si i atu lawngah biaceihnak zung nih nawl chuah a si caah khoika in dah tlaih an si timi bel cu chim khawh a si lo tiah CDF lei nih an chim.

A ziizut a tongmi hna hi SAC he rian ṭuanṭi loding in ralrin pek an si cang i mipi he an i fonh lo ahcun fak piin a ziizut an si lai tiah CDF lei nih an chim. CDF-Kanpetlet nih atu bantuk in an tlaih hna caah SAC nih kahdohnak a tuah lai timi thawngpang a len caah kap hnih karlak entainak a fak tiah khuami hna nih an chim. TCP