CBCUSA nih Hakha CDMers Hi Biatak Tein An Hmaithlak Hna

Home

Kan theih bantuk in kan ram dohthlennak ah abiapi taktak mi cu cozah riantuantu hna nih CDM an tuah mi hi asi. Cu nih cun ramchung cozah rian a kal khawh hnga tluk in a kal ter kho lo. Ralhrang nih heh tiah rampi hruai an timh len ko zongah riantuantu an um ti lo ahcun zeitihmanh in an cawl kho lo. Atu hi Chin ramkulh khualipi HAKHA CDMers hna hi CBC USA nih biatak tein aa hmaithlak. Tuan ding tampi lakah Hakha khua CDMers hi suttung pakhat bantuk an si caah biatak tein aa hmaithlak.

Zeiruangah dah Hakha CDMers cu aa hmaithlak khun ti ahcun, kan theih cio bang, Departments kip Cozah zung vialte, fimcawnnak pical vialte cu Hakha ah office chiah in hrambunh mi asi. Hakha khualipi chung cozah riantuanmi vialte hna nih an rian an kaltak dih ah cun zeitihmanh in ralhrang nih rian a kal pi kho lo ti afiang. Cu caah CBC USA nih a ti khawh tawk in CDMers hna cu bawmhnak pek peng aa tim. CDMers hna hi tulio Dohtlennak ah a biapi taktak mi an si tiah CBCUSA upa pakhat nih a chim.

CBC USA nih bawmhnak a pekmi hi chimtlak lote asi ko nain, nihin tiangah CDMers chungkhar pawl an vuivai lo, miphun dawtu taktak an si. Upat tlak le zohchun tlak an si hna. Hakha Thantlang peng chung CDMers hna chungin tampi cu rian an chuahtak cang ruangah a harsami an tam ngai ngai hna. Hi hna vialte hi miphun dawtnak ruangah harsa aa thimmi an si hna. Bawipa nih zohkhenh ko hna seh.