Cawnpiaknak Hman Lo Hi An vak Cuahmah, Khrihfa Iralrin Hau

Nal Prophet- Cawnpiaknak Hmaan Lo.Atu lio Khrihfa, zumtu a simi hna nih kan i ralrin dingmi pakhat cu, “Thawngțha bia an chimmi kan theih tikah kan theihmi bia hi baibal ningin a si maw si lo? Baibal he ai kalh maw, kalh lo?,” ti hi kan i ralrin dingmi a si. Kan theihmi thawngțha bia paoh kha fawi tuk in zumh ding a si lo. Bawi Jesuh Khrih nih a rak chimchung bia bangin cawnpiaktu dik lo, profet deu an chuak chin lengmang cang. Nizan naite ah khan Kenya ram ah cawnpiaknak hmaan lomi a um. Cu cawnpiaknak dik lo cu an i zumh ruangah mi tampi nunnak a liam. Pastor pakhat nih a Khrihfabu pawl cu ni 3, ni 7, ni 14, ni 21, ni 40 tiah a ni khiak loin thih tiangin rawl a ulmi paoh cu vanram nan kai lai tiah a cawnpiak hna i an thih tiang rawl a ulhter hna.

Kenya ram Kilifi district Shakahola ramtang, tupi chung hmun pakhat ah Khrihfabu pakhat a simi Good News International Church chungtel, member an si tiah an ruahmi hna i an ruak pawl cu mithah lainawnnak hlathlaitu palik pawl le mi chanhchuahtu phu pawl nih 22.04.2023 ni ah an va laak hna. An Khrihfabu hruaitu, an pastor Paul Mackenzie nih, “Thih tiangin rawl a ulmi paoh hell nan tla lai lo. Ahohmanh nan thih tiangin rawl nan ulh ahcun vanram ah nan kai dih lai. Zawtfahnak ruang le zeidang ruangah a thimi paoh cu vanram nan kai lai lo. Rawl zong ei lo, ti zong ding lo bakin thih tiangin rawl a ulmi lawng vanram nan kai lai tiah a cawnpiakmi hna cu an i lun, zumh ruangah atu bantukin rawl an ulh i an thihnak cu a si,” tiah an ti. An pastor pa cu 15.04.2023 ni ah palik nih an tlaih i thong an thlak cang. Nizaan tiangah a ruak in an va phawh, an va laakmi hna hi ruak 73 an si cang tiah cu thil a hlaihlaitu phu i an hruaitu pakhat nih cun a chim.

Pupa Minthang Ralțha Hna Lennak Lairam . Dear, Miphun hawile hna Dam in nan um cio dih hna maw? Nan umnak hmun le nan khuasaknak cioah Bawipa nih thluachuahnak in pe ko hna seh. Pupa Minthang Ralțha Hna Lennak Lai Ram A hlan lioah cun e kan Lai ram cu ahohmanh nih rak uk lomi Lai ram le ahohmanh nih rak pen lomi Lai ram, zalongtein rak tlonlennak kan Lai ram dawh a si. Hlan kan Pupa ralṭha rual hna nih dirkamh hna kan Lai ram cu. Asunglawi bik an nunnak tiangin rak pe hna maw kan Lai ram caah tiin. Sihmanhsehlaw cuar raang (Vun raang) rual hna nih cun zeithei loin rak uk hna ee kan Lai ram cu. Miphun aa khat komi Lai miphun cu rak ṭhen dih hna ṭhen thum le ṭhen li ah maw. Cheu khat cu India ram ah maw, cheu khat cu Bangladesh ram ah maw tiin, cheu khat cu Kawlrawn (Myanmar) ram ah maw tiin…, kan Lai ram cu rak samh dih hna. Hlan ah miphun fa lo Lai miphun cu atu ah cun khat le khat ko hmanh i ral cang hna maw aa thei bal lo bang. Unau kan si ti kha philh dih hna maw e.

Atu ah cun vun raang uknak tangin ngian tam Kawl rual uknak tangah tla thai cang maw kan Lai ram cu ee. Lai mi kan lungfim a cu cang, kan dir i kan ṭuan awk a si cang, kan ṭhut sawhsawh ko ding a si ti lo. Atu hi caan ṭha na ngeih lio caan te a si. A hnuah ti ti hlah, caan nih an liam taak sual lai. Zingka (Zing niceu dawh) ni a chuak cang, rianṭuan dingah i thawh cang law it sawhsawh ti hlah. Atu hi ih sawhsawh ko caan a si ti lo, zaanlei ninem nih an liam tak sual lai. Atu caan ṭha na ngeih lioah tho cang law kan Lai ram le kan Lai miphun caah ṭuan cang tuah. Ka nu Lai ram nih nang an herh. Minung Nunnak Hi- Minung kan nunnak hi meh chumhnak bel he ai lo ka ti. Meh kan chumh tikah a al he a kha he a thlum he a thak he a thur he tiin a phunphun cawh in kan peih hna. Cu bantuk te cun minung kan nunnak zong hi a si ve. Kan chuah in kan thih tiang kan pawcawm kawlhawlnak caah tiin harsatnak le temtuarnak, ngaihchiatnak le lunglawmhnak, hnangamnak le lungretheihnak, țihphannak le thlalaunak, thlichia lak le tilet lakah tiin harnak a phunphun lakah a țhang i a cawlcangmi kan si. Sihmanhsehlaw kai za cang ka khim cang ti cu a um kho hlei bal fawn lo. Kam khat leiah thil țhalo a tuah lengmang i an rianțuannak kip ah a hlawh a tling lengmangmi hna nih an um peng fawn hoi. Cun minung kan nunnak hi mawțaw in khual a tlawngmi he kan i lo rih fawn ka ti. Mawțaw chungah cun miphun kip kan i cawh hna. Ruahnak a phunphun, sining a phunphun, ziaza a phunphun tiin mițha he mițhalo he, kan hngalh balmi hna he kan hngalh bal lomi hna he tiah miphun kip in kan i tong hna.

Sihmanhsehlaw a donghnak i mawțaw a vun dir tikah cun kan dihlak in kan țum hna i bye bye tiah kutza i chanh buin kanmah le kan lam cio kha zul in kan i țhen țhan hna. Minung nih kan cin thlai rawl hna cu khuasik caan a hung phak cun kan țuan i kan zuun tawn hna. Cu bantukin cun kan nunnak lamthluan ah hin țhatnak siseh, chiatnak siseh kanmah le kan tuahning cio in kanmah cio nih kan zuun ve hna lai. Caan tampi ah cun thil tampi kan hmuhton hnu lawngah nunnak timi hi kan i fiang. Mi tampi hna cu sual palhnak kan tuah ruang le sunghzatlaknak kan ton hnu lawngah nunnak timi le minung kan nunnak ah zeidah a herh i zeidah a herh lo timi kan hun i fiang țhan tawn. Zei kan tuah hmanh ah ka palh sual lai tiah țihphannak ngei hlah u sih. Țih loin hmai tu ah fong chinchin ko u sih. Nifatin kan nunnak ah thil țhalo an i tinhmi a tuah kho lengmang i an rianțuannak ah a hlawh a tling lengmangmi hna khi hngar len duh hna hlah u sih. Kan nunnak lamthluan ah ngaihchiat, retheih thabatnak le harsatnak phun kip tong in le vawlei thilrit kha tuar in kan thil rit ko hmanhsehlaw Bawipa hmaiah cun dai tein um ko u sih. Zeidah a tuah lai ti kha lungsau in hngak ko hna u sih mu. Bawipa nih a fale cu a kan philh ballo. Dinnak kha a cat lomi tiva bantukin luanter camcin ko u (Amos 5:24). Salai K. Biak Lian Thawng –Vawleicung zumtu hna caah tihnung bik cu cawnpiaknak hman lo asi ko.