AA le MDF pawl Cawlcangh Hi CDF-Mara le CNA Caah Tihnung An Si Kho Cang

Mara Ram Chung ah AA Ralkap 60 An Lut, Khuami Lungrethei in An Um! Mara ram chung ah Rakhine ralkap Arakan Army (AA) le Mara ralkap phu khat a si mi MDF hna i fonh in minung thazaang 102 cu Mara ram chung ah an lut i zeitik caan poh ah kahdohnak a chuak kho mi dirhmun a si ca ah khuami lungrethei in an um, tiah theih a si. Mara ram chung ah a rak lutmi AA ralkap hi ralbawi pakhat telh in ralkap 60 an si i, MDF lei in AA sin ah ralkap cawnnak a kai mi minung 42 zong an i fonh chih, tiah theih a si.

Hi kong he pehtlai in Mara CDF supporting lei ṭuanvo ngeitu pakhat nih, “Mara ram chung ah May 12 ahkhan an dihlak in an rak lut i MDF chungtel 42 hi anmah AA sin ah ralkap cawnnak a ngei mi an si. Ralkap cawnnak a dihmi MDF ralkap 42 an rak thlahpah mi hna kan lawhter. An uniform ahhin AA uniform a si i an hmailei ah Mara Pasaltha tiin an ṭial,” tiah a chim. Hi kong he pehtlai in MDF lei ṭuanvo ngeitu sin ah phone in pehtlaihnak kan tuah ko hna nain Phone a tlai kho lo.

“Atu hi Mara ram Heimatea khua ah an um. Meeting an auh hna i, thimnak tuah an i tim. Hi an i timhmi a dih hin cun khuate kip ah an vak lai tiah kan ruah. Khuami hna zong lungrethei in an um ko,” tiah Mara CDF supporting lei ṭuanvo ngei pakhat nih cun a chimchap. Kan ram chung ah duh poh in an um a si ahcun CDF Mara zong nih kan zoh sawh hna lai lo, tiah CDF Mara nih an Facebook cahmai ah an langhter.

Mocha Thlichia Nih Hakha Khua Thar Inn 5 Hrawng A Hrawh. Nizan May 14 ah a hrangmi Mocha thlichia nih Hakha khua thar sang inn 5 hrawng a hrawh hna, tiah theih a si. Hi kong he pehtlai in Hakha ummi pakhat nih cun, “Thlichia cu fak tuk in a hrang lo nain Hakha khua thar sang inn 4-5 kar hrawng a hrawh hna i, inn a rawh ning zong an fak tuk lo. Faak deuh in hrang sehlaw khua thar lei inn tam ngai a rawk lai,” tiah The Chin Post ah a chim.

Khua thar sang inn rawkmi hna cu sang mino 30 hrawng nih khua deika tein an zuanhnawh hna i, an remhpiak hna. thlichia a hran hlanah khua thar mino cu lakhruak phu an ser i, thlichia nih inn a hrawhmi hna cu May 15 zinglei ah an zuanhnawh cio hna i, remhpiaknak le thianhhlim piaknak an ngeih hna, tiah theih a si.

Thlichia Nih Chinram A Lonh Cang, A Hrawhmi Tlawmpal An Um. Kan ṭih tukmi Mocha thlichia nih Rakhine le Chinram cu a lonh cang i a tha zong a ṭum deuh cang caah a hring muici ah kan chiah cang tiah SAC tang khuacaan zohnak zung nih May 15, tuzing ah an thanh. A hringmi muici cu ṭihphan ding a um ti lo tinak a si caah a rawkmi fimtawl rian le mibawmhchanh rian ṭuan khawh a si cang tinak a si.Thlichia cu Sagaing ramṭhen, chaklei Kahtha khua pawng in nichuah thlanglei ah a kal tiah theih a si. Chinram a lonh cang caah hnangam tuk ding a rih lo. Thlichia hnuah a hnuzul thlichia le ruah fak in a sur kho tiah khuacaan zohnak zung nih cun an thanh.

Mocha thlichia nih Hakha khuathar ah inn pahnih a hrawh i pehtlai in a sur rih, thli cu a dai ngai cang. Paletwa ah inn a hrawhmi a um lo nain phone line a ṭha rih lo. Sami ah inncung a hawhmi a um len. Matupi ah CDF battalion hmunpi pakhat fak ngai in a rawk. Kanpetlet ah inn pakhat, biakinn pakhat le sianginn khan pahnih a cungcih a hawh hna. Peng dang le hmundang thawngpang theihfian khawh a si rih lo. JOINT TYPHOON WARNING CENTER (JTWC) nih a hnubik an thanh ningah May 15, nihin zanlei 6:30pm ah thlichia cu a tha a ṭum lai i cuticun a dih lai ti a si. TCP