2023 SAC Tangah Tanghra Camipuai Phimi Cu an Inuam Bak Ko Lai

Sami Ah Tanghra Camipuai A Phitu Hna Nih Langsar Tuk In Ca An I Fir. Chin ramkulh thlanglei Sami ah SAC kuttang cacawnnak tanghra camipuai cu March ni 8 in an thawk tiah theih a si. Sami khuachung ummi hna nih an chimning ah “tanghra camipuai a phitu siangngakchia hna nih langsar ngaiin ca an i fir” tiah an chim.

SAC ralkap hna nih an nungak hna cu camipuai an tuahnak khaan pawng tiang an kalhnawh hna. Cheukhat cu camipuai an tuahnak khaan thlalangawng tiang kalhnawh in bawmh an duhmi siangngakchia hna i question paper cu an hal hna hnu ah anmah nih an phitpiak hna, cu hnu ah catlap cu an pek ṭhan hna. Hi ka ah hin cu SAC ralkap cu zapi nih ṭih tuk cio a si caah Education Department lei zong nih zeihmanh an chim ngam lo, hi tluk tiang a si hnu i camipuai teinak an hmuh lo a si ah cun a ruahawk ka hngal ve ti lo” tiah Sami khuami pakhat nih Media ah a chim.

2023 kum Sami khua ah tanghra camipuai a phimi 290 hrawng an si, kum dang tawn zong ah tanghra camipuai a phimi hi 300 hrawnghrang an si tawn caah tutan hi kum dang kel a si ko tiah tualchung mi pakhat nih a chim. Ca thiam hna seh ti kan duh ruang ah ca kan cawnter hna i atu bantuk camipuai ah ca an i fir ka hmuh tikah ngaihchia ngai a si ko tiah a chim chap. The Chin Post